BAS hag Arvorig FM dorn-ha-dorn
Pelloc’h ha donoc’h e vezo freuzet gant abadenn “Ar Bagadoù“ hag a zo bet diouti abaoe bloaz bremañ. Pevar Leonad a raio muioc’h a drouz eget unan, sur eo ha n’eo ket marteze. Evit harpañ an Ifig a Wiseni da doullañ hent gant BAS eo deut Lors Moal, Gwenole Fauve ha Tangi Thomin, anezho tri soner eus ar re ampartañ. Tri-ugent strollad disheñvel, tost da bemp bloaz warnugent : anv a oa da zerc’hel ar peb talvoudusañ deus ar gampionadoù hag ar gouelioù, ledan eo bet ar pourvez gant Bodadeg Ar Sonerion. Feiz, tud mailh war ar sonerezh a zo deus ar pevar faotr evit mont a-benn d’an hent. Mall zo ganto rentañ enor d’ar gwellañ bagadoù ha kouplajoù daou ha daou. Maouted a vo diouto evit displegañ ar binvioù, an istor ha peb munud az a d’ober an tonioù.
“Bez e oa tud o c’houlenn e vije savet an abadenn e galleg, padal hon eus dalc’het mat e brezhoneg“, eme Herve Ar Beg, rener Arvorig FM. Liammañ daou ved a vez distaget re alies an eil diouzh egile, kement-se a zo an den gantañ en e veno. Pelloc’h e sell ouzh an dazont en ur lakaat “emañ an traoù o cheñch pa weler kalzig a vrezhonegerien yaouank o lakaat o anvioù er bagadoù“. Lorc’h zo ennañ pa vezo roet ar son hag an ton d’an daou benn eus ar voul douar, sonerezh, yezh hag all a-drugarez d’an internet. Ken priziet eo sonerezh Breizh er bed holl, un druez ma ne vije ket mareadoù a selaouerien evit lakaat o divskouarn da dañva ur seurt friko, o kregiñ gant Gouel Ar Bombardoù en Erge Vraz.
Abadenn “Ar Bagadoù“, bep Gwener da 7e noz, adskignet d’ar Sadorn da 4e30 ha d’ar Sul da 11e30 mintin.
91.7MhZ
